Новости

07 декабря 2015

Тыыҥааһыннаах быыбар

Алтынньы 21 күнүгэр Кутана оскуолатыгар быыбар буолла. Оскуола президенигэр кандидатынан турбут X кылаас үөрэнээччилэрэ Прасковья Игнатьева уонна Семён Фёдоров, хамаанда тэринэн, оскуола дириэктэрэ Капитон Николаевич Никифоров, соцпедагог Светлана Егоровна Спиридонова, завучтар Изабелла Николаевна Третьякова, Валентина Валерьевна Макарова, төрөппүт кэмитиэтин бэрэссэдээтэлэ Алёна Александровна Крыжановская, психолог Елена Евгеньевна Архангельская уонна биһиги, оскуола хаһыатыттан Арнольд Куприянов, Күннэй Гурьева, иннибитигэр бырайыактарын көмүскээтилэр.

84

Прасковья Игнатьева хамаандата «Мы – будущее школы» диэн бырайыагын билиһиннэрдэ. Кинилэр сүрүн сыаллара – оҕолору түмүү. «Кылаас-кылаас бэйэлэригэр «бүгэн» баран сылдьыылара, кылаас иһинэн эрэ тэрээһиннэрэ – оскуола бүттүүнүн түмсүүтэ суох буолуутугар тиэрдэр. Оскуола үөрэҕинэн эрэ олорбот, сынньалаҥ эмиэ интэриэһинэйдик ыытыллыахтаах. Холобура, дискотекаҕа оҕолор кэлбэт буоллулар. Арай былырыын биир дискотекаҕа оҕо барыта кутуллан кэлбитэ. Тоҕо диэтэххэ, бу дискотекабыт араас куонкурустаах, оонньуулаах, «тематическай» этэ. Ол иһин бары тэрээһини итинник кэрэхсэбиллээхтик оҥоруохха наада диэн түмүккэ кэлэбит. Аны, «Тимуровскай» үлэни кылааһынан буолбакка, оскуола бүттүүн этэрээттэринэн арахсан ыытара ордук», – диэн эттилэр.

Семён Федоров «Рассвет» хамаандата, ыйга биирдэ киинэ көрдөрөн, араас тэрээһиҥҥэ, куонкурустарга бириис ыларга анаан харчы киллэрэргэ этии киллэрдэ. Кинилэр «десантнай этэрээт» тэринэн, ыалга биир-биэс харчыта суох көмө оҥоруохтарын, оскуола олоҕун сырдатар хаһыаты таһаарыахтарын сөп эбит. Маны таһынан, урут Светлана Гаврильевна Мартынова ыытар экспедицияларын сөргүтэн, Иннокентий Николаевич Иванов «Сүүс алаас» диэн кинигэтигэр суруйбут алаастарыгар чинчийэр айаннары тэрийэргэ баҕа санааларын биллэрдилэр.

83

Экспертэр таах олорбокко, ыйытыы бөҕөнү биэрдилэр. Капитон Николаевич бу икки хамаанда үөрэх туһунан эмиэ толкуйдуохтаахтарын эттэ. Дьүүллүүр сүбэ оҕолор бырайыактара кэскиллээҕин бэлиэтээтилэр. Изабелла Николаевна оҕо аахпат буолуутугар тохтоон, «Кэскил» хаһыакка сурутууга туох санаалаахтарын ыйытта.

Быыбар хампаанньата сэргэхтик, тыҥааһыннаахтык ааста. Прасковья Игнатьева хамаандата ыыппыт уоттаах-күөстээх тематическай биэчэрдэригэр агитацияны мүччү туппатылар. Оттон Семен Федоров хамаандата, уруок икки ардынааҕы сынньалаҥҥа былакааттаах «несанкционированнай миитини» сэргэхтик ыытан, үөрэнээччилэр, учууталлар болҕомтолорун тартылар.

Тыҥааһыннаах киирсии түмүгүнэн, V-XI кылаас 108 оҕотуттан 60 куолаһы ылан, Прасковья Игнатьева кыайыылааҕынан таҕыста. Хамаандата бырайыактарын олоххо киллэрээри, үлэ үөһүгэр түстэ. Икки хамаанда бэйэ-бэйэни ситэрсэн, биир сүрүн күүс буолан, оскуолабыт сайдарын туһугар ситиһиилээхтик үлэлиэхтэрэ диэн эрэнэбит.

 

 Арнольд Куприянов,

 Александра Андреева.

 «Кутана кыымнара» пост.

Кутана, Сунтаар.

← Вернуться к разделу