Новости

08 декабря 2015

Охсуһуу дуо? Эс, ама…

Спорт бэрт элбэх көрүҥнээх. Олортон Саха сиригэр бойобуой охсуһуу көрүҥэ саҥа сайдан эрэр.  Нууччалыы “смешанные боевые единоборства”, оттон  омуктуу “Mixed Martial Arts” диэн суруллар. Билигин Саха сиригэр бу көрүҥү сайыннарарга аналлаах спортивнай кулууптар бааллар: “New ERA”, “Белый медведь”, “Мохсоҕол”, “Урааҥхай”,  “Wrestling MMA” уонна “Саха Fight”.

Дьулус Акимов, бойобуой охсуһуу көрүҥэр РФ спордун маастарыгар кандидат:

111

– Мин Томпоттон сылдьабын, ХИФУ-га геолого-разведочнай факультет IV кууруһугар үөрэнэбин. VI кылаастан тустуунан дьарыктаммытым.

Бойобуой охсуһуу диэн бу универсальнай көрүҥ. Манна тустуу, бокс, кикбоксинг, тхэквандо, самбо, о.д.а. барыта холбоһон,  биир көрүҥ буолар.

Устудьуоннуу киирэн баран, бокска, тхэквандоҕа, кикбоксиҥҥа маастар нуорматын толоруохпун наада диэн сыаллаах-соруктаах сылдьыбытым. Маҥнайгы кууруһу бүтэрэн баран, бойобуой охсуһуу көрүҥэ баарын билэммин, холонон көрөргө соруммутум.

“Саха Fight” диэн кулуупка төрдүс сылбын дьарыктанабын, тренерим Евгений Георгиевич Юнков. Билигин нэдиэлэҕэ 6 күн дьарыктанабыт. Баскыһыанньаҕа эрэ сынньанабыт. Оттон күрэхтэһии иннинэ күҥҥэ иккитэ дьарык буолар. Ыйааһын быраҕарбытыгар 6 күнү супту уу иһэбит, күҥҥэ 8 лиитири.  Онтон күрэхтэһии буолуон икки күн хаалбытын кэннэ уубутун уонна аһыырбытын аччатабыт.

Республикаттан саҕалаан, Россия таһымыгар тиийэ күрэхтэһиилэргэ кыттааччыбын. Бу ааспыт нэдиэлэҕэ Благовещенскай куоракка киирсэн кэлбиппит. Саха сириттэн иккиэ буолан барбыппыт, мин уонна Вова Федоров. 63 киилэҕэ киирсибитим. Утарылаһааччым – Благовещенскай уола Вазген Дагловекян. Кинини 2-с рауҥҥа кыайбытым. Онон үөрэ-көтө дойдубутугар кэлбиппит.

109

Уһук Илин уокуругар  иккис миэстэ буола сылдьыбытым. Маастар нуорматын толорор олус ыарахан. Билиҥҥи туругунан Уһук Илин уокуругар бастакы нүөмэр буолуохтааххын. Икки сыллааҕыта оннук буолбатах этэ. Мин тэҥҥэ дьарыктанар уолум Гаврил Гуляев уокурукка чөмпүйүөннүү сылдьыбыта. Онно маастар аатын биэрбэтэхтэрэ. Билигин мин маастар буоларга күүспүн-уохпун барытын уурабын.

Бу нэдиэлэҕэ Москваҕа устудьуоннар икки ардыларыгар бойобуой охсуһуу көрүҥэр чемпионат буолар. Онно кыайар туһугар күүстээх-дьулуурдаах дьарык буола турар. Саха сирин ааттаппыт киһи диэн баҕа санаалаахпын!

 

Иннокентий Владимиров.

← Вернуться к разделу